Lunglen

Engnge maw a nih chiah le? Tlangval a pumpa, ngaih ber tur pawh hre si lova, ‘lungleng’ tih tawngkam kan hman kan hman tak mai le? Mahse, zep theih a ni lova, thup theih lah a ni si lo. ‘Ka lung a leng’ ka tih hian a eng ber nge leng lah chu ka sawi thei chuang bawk si lo. Min tham veng veng a, zai vaka reh thei lah a ni chuang si lo. Tlai Ni tla tur, kawlkil tawp a chhun sen phut thin te hi en liam har ka ti a, ka thlir ka thlir mai thin. ‘Intipachang’ tih tawngkam te hian ‘lunglen’ nat zia a puangchhuak chiang zual zel zawkin ka hria. Keizawng, ka thiam ve lo… lunglen thup tuma tankhawh hi.

            Kumin khuangchawi thla zet chu, engamah hmain leh inthawt lawkna pawh awm hauh lovin a vawt nghal em em ringawt mai. A mak ka ti, khawvawt te hi ‘lunglen’ kaithotu an ni  ta zel mai. Hetiangte chuan engtinnge maw kan khawsak tak zel ang le? Kumin a chaldelh tawh leh la tuai deuhte pawh, a leng mi hi zawng kan awm chiang a lawm. Khuangchawi thla thla engte hi in thlir ve ngai em? Thlaeng lawm nungcha tinrengte hram thawm te hi… keizawng, insum har ka ti thin. Awmlo an awm vang a ni lova, awm an awmloh vang pawh a ni lo. Chhungkhat lainate uaplum phak loh a chettlat vang a nilova, thenrual thate’n min hnemthiam loh vang lah ani hek lo. Siamtu khuarel, danzawh rual loh thilsiam hrang hrangte hian a kaitho thin ani zawk e. ka tan chuan hei hi pumpelh theih a ni lo. Ngaihtur neih leh neih loh lam ani lova, lungchhiatna ko chhuak chi pawh ani chuang lo.

            Sahmulphah thla a herliam ang a, Pawltlak thla a rawn her chhuak leh thung ang. Aw… chutih hunah zet chuan engtinnge maw kan awm tak zel ang le? ‘Rem Lal’ pian hun champha hmatiangah kan thlir ang a, Sikni engmawi leh zan boruak thiang daifim leng vel te’n min chiah leh dawn ania. Kawrlum leh chat, hmuirep leh sikri,… sawi tam lo zawk mai ang.

            Mahse ka vui lo. Lungleng thei a ka awm hi nuam ka ti. Changpat cheh chum ang mai a tal mai mai lo a, Siamtu kutchhuak, themthiam em em mai te’n a ka lunglen an kaitho thin hi ka tan chuan a nuam a, a tawrh a hahdam tlat. Lunglen zawng a na a lawm, ka zep lo. Mahse tawrh a nuam thung. He lunglen han tawrh a, awm mai ami pawh ‘a leng veng veng’ tih tawh chinah hi chuan tihtur dang hi a vang tawh thin. Amaherawhchu tihtur pakhat ka nei. Heti tak maia themthiam, ka lungti lengtu tur rawn duangchhuaktu Pathian hi faktlak a va han ni em. Hla siamtu paw’n;

“Aw Lal Pathian I kutchhuak thilsiam tinreng

Dawn changin mak tiin ka lo khat thin…”

A lo tih ve tho kha maw…

(He thu hi Dt.13th.Oct.2003 tlailam dar 6:30 leh 7:30 inkar vela ka ziah a ni. Boruak lum tak mai vawt varin a a rawn thlakthleng tan, lunglen tuar har ka tih em em lai a ka ziah a ni.)