Christmas nge X-mas?

Internet lama thiansiamna hmun larber te zinga mi Facebook ah hian thlalak hrang hrang ka enkual mai mai a. Chuta ka thil hmuh pakhat chu tlangval pakhat hian Zu um engemaw zat tlar dal bulah hian thla a la a, a caption ah 'X-mas chhung chu ka tla em ang chu maw?' tih hi a hmang a...ka ngaihtuahna a kal thui ngei mai.
Kan Lalpa khan Mihringte mamawh hria in Chhandamna kan chan theih na'n A Fapa chu rawn tirin tlawm takin alo piang a. Chu hun, kan Lal Isua lo pianna hun chu Dec 25 ni a ngaiin kan lawm thin ta a. Engvanga lawm thin nge kan nih tih lam reng ngaihtuah lo a  kan duhdan dan a kan lawm a, Christmas/Krismas pawh ti tha peih lo a X-mas te kan han tita vel mai hi chuh....ka ngaihtuahna a kalthui khawp mai.
Kum 2/3 liamta velah khan kan Kohhrana kan Upa pakhat chuan Christmas lai vel a ruah a sur theih nan a tawngtai a rawt mauh mai a. A rawtna chhan ber chu he hunlaia mi tamtak te'n Christmas ti Christmas tu lam reng hrechang lo a kan tal vel thin hi a tlem theih phah a beisei vang a ni.
Zu um 10 chuang neih a Christmas hman tum tlat mai te, a Biak-in lamhawi lo lutuk mai a Christmas hman tum tlat mai te hi engvangnge nita ang le? Lalpa Pathian hian mihring te'n a kan mamawh a hria a, sum leh pai mamawh ni ila chuan Economist a rawn tir mai ang. Hlimhlawp lam mamawh ni ila chuan Entertainer min pe leh mai ang. Mahse Sual a boral mai turte'n Chhandamna kan mamawh a ni tih hria in A Fapa chu kan chhandamna atan he leiah hian a rawn tir a ni. He Lal Isua piancham kan lawmna hunah hian nang engtin nge i hun i hman ve dawn le?
Christmas nge i hman ve dawn X-mas?

TAWNGTAINA

Harsatna leh manganna hrang hrang ka tawh chang hian Lalpa, Nangmah neitu nih hlawkzia ka hre thar leh thin a, tuarna hrang hrang alo thlen pawhin, Nangin Nangmah avanga tuar tlakah min ngai tih tarlanna a nih avangin ka lawm e. Malsawmna ka dawn thin te ka chapopui loh nan, Lalpa ka thinlung nei la, Nangmah hretu ni ngawt lovin Nangma mi hriat ka lo nih zel theih nan min hruai ang che.

Nangma hnena hlanlet leh tur thiamna ka neih theih nan Nangin min tanpui la, ka phak tawka I rawng ka bawlna kawngah hlawk zawka kalo thawh ve theihnan, he ka dilna hi min tihhlawhtlinsak ang che.

AMEN

March Ni Sawm leh pahnih

Dt.12^th.March.2007 zing a ni a, tuk dang nen a danglamna awm a awmlo. Ni a chhuah ngaiin a chhuak a, khaw awmdan leh nunphung hrim hrim pawh a pangngai a ni. Mahse, he ni ah hian kan chhungkua in thutlukna lian tham tak kan siam phahna tur thil a thleng dawn tih reng kan hre lo.

            Nia, he ni hi nidang nen a danglamna a awm hran hauh lo, zing dar 9:00 hma kha chuan. A danglamna ber chu BCM Assembly kan kohhranah nghah ani a, chuta lokal palai ho te an haw ni a ni kha a ni mai. Zing dar 9:00 vel a ni a, gas sem motor lo kal thawm avangin a bur ruak pakhat kan neih ve chu lak tumin ka in pu chhuak a, kan kawmthlangah ka chang a. Chu ka gas la tura kalchhuak chu, kan hmangaih, kan duat em em leh kan chhungkaw member pakhat ang chiaha kan neih kan Zawhte chuan min zuichhuak ve a. Kawmthlang kawngpuiah chuan a tihdan ngaiin a han tal let lah tap tap a, kei pawhin gas phur motor alo la thlen loh deuh avangin kawngthlang lama kan Zawhte chhawnchhaih chuan ka zu pan thla a, kan tihdan ngaiin mihring biak tak hian ka be leh mawlh mawlh a. Ani pawh chuan a tih fo thin dan ang bawkin ka chhaihna chhang let chuan a lim kual leh ta zak zak mai a. Chutah kawngpui lamah chuan a tlanchho a, ani…… a pawi zo ta. Auto-rickshaw rawn tlan chu ka hmu a, ka au ding hman lo a, kan zawhte lah ka tiding hman hek lo. Tichuan kawngpui charah chuan kan duat em em chu a chil er ta ngawk mai. Auto-rickshaw number ka chhinchhiah hman lo, kan duat ve em em chu a na ang tih ka ring a. Beiseina chhete erawh ka nei. Muangchangin, na neilo ang maiin kan in lam chu a pan chho tlat. Mahse, thui a kal lo. A awp rep a, a vial ta ngalh ngalh mai a. Ka rilru a va han na tak em. Ka nau ka ko a, a ni’n a pawm chho a, ala tal arh arh reng mai bawk. Ka nau pawh chuan thui a pawm hman lo. Kan In pan chhohna step an chhuah hmain leiah an inmut leh rih a, tichuan kan duat, kan hmangaih, kan zawhte NUNNA chu alo tawp ta. Aw… a taksa ah pem awmlo mahse, a kawchhung lamah hliampui a tuar ani tih hriat taka a ka atanga thisen lo luang chhuak ngiai ngiai ka hmuhte khan ka rilru ava tina tak em.

            Nikum 2006 April thla vel bawrah kan la a, kan lak hlim a a tin ziau in kan thutphah a ham pawr pheng te hi ala awm reng dawn si a leh. Alo thanglian ve deuh deuh a, a ek bawm kan siamsak a hai ri rek rek thawm kan hriat thinte kha aw. Kan chawei chhung zawnga min dil ve ni chuang silo va kan chhungkaw chawei lai dawhkan chung atang ngei a minlo thlir ve deuh deuh thin te kha. Thutthleng a mu kan awm tawh phawt chuan zakhnuai lum thlahlel in a rawn chuh vat a. Thlasik meilum kan ai lahin a tu emaw ber ke kham chung lo chuan a ai duh thak lo. Kawngkhar a rik rek rek tawh chuan thiam leh thiam lova kawngkhar rawn hawn ve a tum kut rawn zen lut tawk tawk kha hmuh ka tum fo mai nia. A nilum ai na thin te, sangha dila tui ka dah tur min rawn zui ve chak chak thin te, tukverh atanga pawnlama a ei theih awm thil rannung te ilo chang a bawk van laite hi a tak hmuh tur awm tawh lo mahse, ka mitthla ah hian a cham reng thin.
            Tichuan, hemi Ni atang hian keini chhungkua chuan midang te'n a ho mai mai a an ngaih ani maithei e, mahse thutlukna lian tak kan siam phah ta a. Tunchinah chuan RAN engmah vulh tawh ngailo turin kan intiam ta ringawt mai ani. He Zawhte pakhat thihna hian keini chhungkaw tlemte a a nghawng hi ava'n lian tak em.... Khami ni-a min chil hlumsaktu(pa) khan a thiltih avang khan hetiang thutlukna hi chhungkaw pakhatin an siam phah ta tih hre tak ang mawle... Dem ngawt theih lah ani bik silo a(!)